Bætur - af því að lög voru brotin á foreldrum og börnum

Hvers konar og hversu háar bætur eru réttlátar þegar bæta skal skaða og miska vegna brota á börnum og foreldrum þeirra, svo varðar líkamlegu ofbeldi, kynferðislegri misnotkun og launalausri vinnuþrælkun? Í viðhengdri frétt greinir frá því að ofbeldismaður hafi í einu allsherjar berserksbulli veist að karlmanni sem sat í bifreið og slegið hann með krepptum hnefa í andlitið í gegnum opna rúðu í vinstri afturhurð.  Síðar um nóttina sló hann sama mann ítrekað með golfkylfu. Á sama tíma sló hann annan mann einnig með golfkylfunni og þóttu árásirnar með golfkylfunni sérstaklega hættulegar. Þolendunum voru dæmdar bætur á bilinu 100 til 300 þúsund krónur frá gerandanum. Hæfilegt? Of mikið? Of lítið?

Hvaða bætur eru réttlátar til handa þeim börnum (nú fullorðnum) sem lutu nauðungarvist að Breiðavík og víðar hér fyrr á árum? Í eftirfarandi pistli veltir formaður BRV fyrir sér bótamálunum.

"Þegar nýr drengur bættist í hópinn í Breiðavík beið hans ætíð ein spurning um leið og hinir drengirnir fengu færu á honum: Fyrir hvað varstu sendur hingað? Svörin voru svo ýmisleg eins og: Ég veit það ekki. Eða: Ég stal hjóli. Ég braust inn. En hvernig svo sem maður svaraði spurningunni var enginn sem sendur var til Breiðavíkur í vafa um að þangað var hann kominn til að taka út refsingu. 

Hvernig hefði manni líka átt að detta annað í hug. Við unnum erfiðsvinnu, lutum ströngum aga um hátta- og fótaferðartíma og okkur var bannað að fara af jörðinni og fylgst með því að við gerðum það ekki. Þetta allt er nú á almanna vitorði; í vetur kom skýrslan frá nefndinni um vistheimili og í framhaldi af því sagði Geir Haarde, forsætisráðherra, að lagt yrði fyrir Alþingi lagafrumvarp sem gerði kleift að greiða þeim mönnum sem enn væru á lífi bætur. Ekki vannst tími til að afgreiða frumvarpið á nýliðnu þingi og er það bæði vel og miður. Skiljanlega vekur það vonir hjá mönnum sem margir hverjir glíma við erfiðar aðstæður að nú batni kannski tilveran með viðurkenningu á að brotið hafi verið á þeim og fyrir það greiddir peningar. En það hefði verið vont fyrir alla ef frumvarpið hefði verið keyrt í gegn á síðustu dögum þingsins og þess vegna kannski ekki vandað til þess eins og þarf. 

En bætur fyrir hvað?

Fyrir að búa við stöðugan ótta?

Fyrir vinnuna sem adrei komu nein laun fyrir?

Fyrir barsmíðarnar og aðra misbeitingu af hendi starfsfólks?

Fyrir einangrunina frá almennu samfélagi?

Fyrir fjarveruna frá foreldrum og ættingjum?

 

Ég býst ekki við að neitt af þessu sé bótaskylt þótt að sjálfsögðu sé tekið tillit til þessa þegar Breiðarvíkurdrengir eiga í hlut því svona eru nú stundum kjörin og þarf ekki að hafa dvalið á Breiðavík til að hafa kynnst þeim. 

Nei, bæturnar eru vegna þess að lög voru brotin á foreldrum þessara drengja og á drengjunum sjálfum. Samkvæmt skýrslu Róberts Spanó fór Barnaverndarnefnd ekki að lögum við störf sín. Ekki var heldur sinnt eftirlitsskyldu með Breiðavíkurheimilinu og með aðbúnaðinum sem drengirnir bjuggu við, bæði hvað snerti skólagöngu og svo annað atlæti, voru lög þess tíma um menntun og aðbúnað barna og ungmenna brotin. Fyrir það á að greiða bætur.

Bárður R. Jónsson".

Dómur héraðsdóms staðfestur í líkamsárásarmáli

Athugasemdir

[SVB, 19.6.2008 kl. 18:28]

hæ,bara smá ath: Kannast við þetta allt,enn í dag er þetta svona,að passa sig að gera ekkert rangt,,til að vera ekki skammaður eða eitthvað verra,koma ekki of seint,bara að gera ekki mistök,svona er þetta enn því miður.Er sammála Bárði,um að við fáum ekkert úr þessu frekar en en skatturinn af olíunni eða bensíni verði lækkaður ,verðum við ekki bara að þrauka eins og alltaf :)Við kunnum að brosa áfram ekki satt :) Kveðja Óli Litli

óli litli (IP-tala skráð) 18.6.2008 kl. 23:36

[María Björk (IP-tala skráð) 20.6.2008 kl. 00:34]

Góða kvöldið..

Sem kærasta hins svokallaða "ofbeldismanns", langar mig að tjá mig aðeins hérna! Það er óþolandi þegar fólk tekur allt sem stendur bókstaflega og dæmir fyrirfram án þess að svo lítið sem kynna sér málið. Nú var ég stór hluti af þessu máli, og það byrjaði þannig að tveir blindfullir og einn edrú strákar buðu mér á rúntinn á Egilsstöðum. En síðan allt í einu voru þeir byrjaðir að keyra með mig á Eskifjörð, án míns samþykkis, sviptu mig frelsi! Ég var dauðskelkuð enda hlógu þeir bara að mér meðan ég öskraði og barðist um í bílnum!

Heldur þú að það sé gaman að vera stelpa sem er haldið fanginni í bíl með dauðadrukknum og snarvitlausum strákum?

NEI! Það er ógnvekjandi og hræðileg reynsla. Það er ástæðan fyrir því að ég hringdi í góðan vin minn sem stökk úr rúminu og sótti mig. Hann hefur aldrei verið ofbeldismaður, en það er munur á ofbeldi og nauðvörn.

Jú hann gaf forsprakkanum einn á kjaftinn vegna þess að hann hló bara að honum þegar hann spurði hann afhverju þeir hefðu gert þetta! En síðan þegar hann ætlaði að fara og ræða málin við gaurana, tóku þeir upp golfkylfur! Það segir í vitnisburði þeirra beggja: " Ég var svo drukkinn að ég man ekki hvort ég  tók kylfuna upp til að lemja hann eða hvort ég var bara að skoða hana . . ."

Stundum þarf maður að kynna sér málin áður en maður fer að dæma fólk. Netið er fjölmiðill sem er öllum opinn og það er ekki gaman að sjá eitthvað bull skrifað um sig þar ...

Kveðja,

Ein ósátt með viðvaningslegan fréttaflutning

P.S. Mér finnst þessi samtök samt frábært framtak og MÉR FINNST að það eigi að greiða Breiðuvíkurdrengjunum HÁAR bætur, þótt að engar bætur geti bætt upp það að líf þeirra var eyðilagt! En það er það minnsta sem hægt er að gera fyrir þá!

[Johnny Bravo, 20.6.2008 kl. 01:48]

Þú kærðir þá að sjálfsögðu fyrir frelsissviptinguna er það ekki?

Af hverju hringdir þú í vin í stað lögreglunar?

Af hverju varst að fara í bíl með ókunnugum karlmönnum ef þú ert hrædd við það?

Fór hann bara til að ræða við þá og ef hann hefði ekki hlegið og sagt, "ég átta mig núna á að þetta var rangt og biðst afsökunar", hefði þetta þá ekki gerst?

Hvaðan komu þessar golfkylfur og hvar átti þær og hvar fór þetta "samtal" fram? 

[María (IP-tala skráð) 22.6.2008 kl. 18:07]

Nei þetta voru reyndar strákar sem ég þekkti ágætlega, og treysti nógu vel til að hleypa mér út úr bílnum þegar ég vildi..en þeir áttu það traust ekki verðskuldað. Og ég hringdi í vin minn vegna þess að hann var sá eini sem mér datt í hug að myndi fara fram úr rúminu um miðja mánudagsnótt til að sækja mig út í rassgati..

Og ef hann hefði beðist afsökunar strax hefði þetta ekki gerst.. það er allavegna öruggt..

Kæra þá fyrir frelsissviptingu? Ráðfærði mig við lögfræðing sem sagði að kærunni yrði örugglega vísað frá.. gildismatið í heiminum er bara svolítið skrítið...

[SVB, 24.6.2008 kl. 12:01]

Það er leitt að María Björk misskilji tenginguna milli þess að segja frá dómi í refsimáli, þar sem þolendum voru dæmdar bætur, og þess að fyrrum vistbörn fái bætur. Almenningur, og þar með við hér, hefur ekki aðgang að vitnaskýrslum umfram það sem kemur fram í dómsmálatextanum. Þar er kærastinn dæmdur fyrir refsiverðan verknað, hver svo sem aðdragandinn var. Samkvæmt dómnum var ekki um neina nauðvörn að ræða og ansi hreint langt á milli hnefahöggs og kylfuhögga.

En aðalatriði færslunnar var að ræða bótamál fyrrum vistbarna hins opinbera og er Maríu þökkuð hvatningin í þeim efnum.

[Lovísa , 5.7.2008 kl. 13:19]

Áhugaverð lesning.