Afsökunarbeiðni fagnað!

   Það er mikið gleðiefni að Jóhanna Sigurðardóttir forsætisráðherra hefur nú fyrir hönd hins opinbera loks gert það sem fyrrum vistbörnin á Breiðavík og víðar hafa lengi beðið eftir og forveri hennar, Geir H. Haarde, heyktist á að gera; biðja þau afsökunar á þeirri ómannúðlegu meðferð sem þau voru látin sæta.

Þetta eru merk tímamót í málinu. Sjálfsagt halda ýmsir að bótagreiðslur séu þessum fyrrum vistbörnum efst í huga, en auðvitað eru númer eitt, tvö og þrjú viðurkenningin á því að óhæfuverk hafi átt sér stað og að beðist sé afsökunar á því. 

Þetta er gott veganesti fyrir Breiðavíkurbörnin og önnur fyrrum vistbörn á vegum hins opinbera, sem í kvöld koma saman á félagsfundi Breiðavíkursamtakanna að ræða sín mál. Þar verður afsökunarbeiðni forsætisráðherrans vafalaust vel fagnað. 

Fundurinn er í kvöld að Aflagranda 40 og hefst kl. 20:30.

Afsökunarbeiðni vegna Breiðavíkur

Athugasemdir

[Pall Runar Elison (IP-tala skráð) 12.3.2009 kl. 14:47]

Sæl öll.Ég er a spitala hér i Svíþjóð. Ég brast í grát þegar ég las þessa grein,svo mikið áhrif hafði þessi lesning á mig.

Kem heim um mánaðarmótin. Kveðja. Páll Rúnar Elíson 

[Friðrik Þór Guðmundsson, 12.3.2009 kl. 14:49]

Vísir, 12. mar. 2009 11:32

Breiðavíkurdrengur segir Jóhönnu sýna yndislegt fordæmi

Georg Viðar Björnsson segir að enn sé beðið eftir niðurstöðu varðandi skaðabætur til handa Breiðavíkurdrengjunum.

Jón Hákon Halldórsson skrifar:

Georg Viðar Björnsson, varaformaður Breiðavíkursamtakanna, fagnar því að forsætisráðherra hafi beðið drengina sem vistaðir voru á Breiðavíkurheimilinu afsökunar á illri meðferð sem þeir sættu.



Jóhanna Sigurðardóttir, forsætisráðherra, bað Breiðavíkurdrengi og aðra sem sætt hafa illri meðferð á heimilum ríkisins, afsökunar, fyrir hönd ríkisins, á Alþingi nú fyrir stundu. Helgi Hjörvar, þingmaður Samfylkingar, spurði hana hvort þetta stæði til af hálfu ríkisins, og sagði Jóhanna sjálfsagt að verða við því. Þó væri ekki sjálfgefið að þeir sem bjuggu við vondar aðstæður á þessum meðferðarheimilum veittu fyrirgefninguna.



„Þetta hljómar mjög vel þó að það geti aldrei orðið neitt persónulegra en svo að Jóhanna sýnir þarna yndislegt fordæmi, að hún vill gera þetta og ganga fram fyrir þjóðina og biðjast afsökunar," segir Georg Viðar í samtali við fréttastofu. „Þetta var náttúrlega ógurlegt óréttlæti í sambandi við þessa krakka sem voru sendir þarna sem að ríkið hefði náttúrlega átt að hindra vegna þess að þetta gekk þarna á í áratugi," bætir Georg Viðar við.



Georg Viðar segir þó að Breiðavíkursamtökin vinni ennþá að því að fá greiddar skaðabætur. „Það vefst svolítið fyrir þeim hvað þeir ætla að borga. „Þeir hafa verið að tala um eina milljón eða eitthvað svoleiðis og láta jafnt yfir alla ganga," segir Georg Viðar. Honum líst fremur illa á þá hugmynd því að hann hafi sjálfur verið þarna í vist í tæp fimm ár en svo séu aðrir sem hafi verið þarna í hálft ár.

[Friðrik Þór Guðmundsson, 12.3.2009 kl. 18:05]

Skil þig vel, Páll. Hlökkum til að fá þig og sjá þig.

[Friðrik Þór Guðmundsson, 12.3.2009 kl. 20:21]

Sjá Gogga okkar í ísland í dag fyrr í kvöld:

http://vefmidlar.visir.is/VefTV/?channelID=STOD2&programID=b2fab606-e8f9-4500-a4d9-15008d8978da&mediaSourceID=34edef4a-4c3b-4981-9d7c-e89e91c9ba14&mediaClipID=6ba2a472-cb72-4ab6-ba1b-e878b4735258

[Friðrik Þór Guðmundsson, 12.3.2009 kl. 23:28]

Gríðarlega sterkur félagsfundur í kvöld. Reyni að gera honum sérstök skil, eftir að ég hef komið ályktun fundarins um afsökunarbeiðni Jóhönnu forsætisráðherra til skila.