Breiðavíkursamtökin - allt áhugafólk um barnavernd velkomið

Nú er rétt liðlega ár frá því Breiðavíkurmálið var tekið fyrir í fjölmiðlum; mér þykir það ótrúlegt að ekki lengri tími sé liðinn. Breiðavík hefur verið með mér nánast alla mína ævi. Það er ekkert undarlegt við það.

 

Ég dvaldist í  Breiðavík um tveggja ára skeið og þótt ég væri ekki að velta mér upp úr því mótar samt reynslan úr æsku lífið og Breiðavík vildi ég bara gleyma.

 

Ég vissi alltaf að mikið óréttlæti hafði verið framið á okkur sem sendir höfðu verið til Breiðavíkur en leit svo á að þar sem heimurinn væri nú eins og hann er næðist aldrei fram réttlæti í því efni. Kannski að þar verði breyting á.

 

Breiðavíkursamtökin voru svo stofnuð í framhaldi af umfjöllun fjölmiðla. Þessi samtök Breiðavíkurdrengja voru ætluð öllum sem höfðu dvalið á stofnunum, heimilum og einkaheimilum á vegum ríkisins og Barnaverndar. Það kom fljótt í ljós að þessi takmörkun sneið félaginu fullþröngan stakk og þótt það hafi gert mikið gagn sem vettvangur til að hittast á hefur ekki gengið nógu vel að skilgreina viðfangsefnin og átta sig á því hvernig þessi hagsmunasamtök mjög svo ólíkra einstaklinga geta best beitt sér í málum þeirra.

 

Á fyrsta aðalfundi Breiðavíkursamtakanna, þann 17. maí, s.l., var því ráðist í að breyta lögum félagsins, opna það fyrir öllum sem vilja leggja þessari baráttu lið og láta sig hag barna og hlutskipti í fortíð og nútíð skipta máli.

 

Eitt verkefni félagsins er að gera sögu barnaverndar í íslensku samfélagi skil.

 

Annað verk sem liggur fyrir vinnst fyrst og fremst á pólitískum vettvangi en það snýst um væntanlegar bætur til þeirra sem dvöldu á þessum heimilum.

 

Breiðavíkurskýrslan markaði tímamót í íslenskri stjórnsýslu. Yfirvöld brugðust við henni með frumvarpi sem átti að taka fyrir á vorþingi en ljóst er að því verður frestað fram á haustið; við í samtökunum erum sátt við það. Það þarf að vanda sig og það er ekki einfalt mál að greiða bætur til þessa hóps.

 

Á aðalfundinum var ég kosinn formaður samtakanna. Ég hafði ekki sóst sérstaklega eftir því starfi. Ég hef látið hafa eftir mér að mér hefði verið sama þótt Breiðavíkurmálið hefði aldrei komið upp á yfirborðið. Mér rann samt blóðið til skyldunnar og þessvegna samþykkti ég að tala við Bergstein Björgúlfsson og Kristinn Hrafnsson þegar þeir komu að máli við mig í sambandi við myndina Syndir feðranna, það var árið 2004/5. Margt hefur gerst eftir það.

 

Nú þreifar ný stjórn Breiðavíkursamtakanna sig áfram en með mér völdust í stjórn þeir Georg Viðar Björnsson, varaformaður og fráfarandi formaður, Friðrik Þór Guðmundsson, ritari, Þór Saari, gjaldkeri, og Ari Alexander Ergis Magnússon, stjórnarmaður og  leikstjóri myndarinnar Synda feðranna (ásamt Bergsteini). Ég vil bjóða þessa ágætu menn velkomna til starfa fyrir félagið og ég hlakka til samstarfsins við þá.

 

 

Bárður R. Jónsson, formaður Breiðavíkursamtakanna

Athugasemdir

[Svavar Alfreð Jónsson, 23.5.2008 kl. 23:51]

Þakka fyrir bloggvináttuna! Óska samtökunum gæfu og gengis. Þið eruð dýrmætari en ykkur sjálfa grunar. Framundan er Dagur barnsins. Það þarf að telja kjark í börnin. Baráttukveðjur! Þið látið mig vita ef ég get orðið að liði.

[Víglundur Þór Víglundsson, 24.5.2008 kl. 09:47]

Er hægt að gera athugasemd við þessi skrif Bárðar, þá aðalegega til að leiðrétta manninn?

[SVB, 24.5.2008 kl. 10:22]

Gjörðu svo vel Víglundur. Leiðréttu að vild, en athugaðu þó að textanum hefur þegar verið breytt vegna íslenskufræðilegra sjónarmiða! Þú hefur kannski annað í huga.

Takk Svavar Alfreð sömuleiðis. 

[Sigurður Þór Guðjónsson, 24.5.2008 kl. 15:05]

Gott að fá þessa síðu!

[SVB, 25.5.2008 kl. 18:02]

Það er ekki hægt að svara fyrir um hvar þeir allir séu og sumir eru dánir, en um marga er vitað og sjálfsagt að reyna að upplýsa þig um það, Ólafur. Ef þú ert ekki félagi í samtökunum þá hvetjum þig til þess að ganga í þau og heimsækja okkur í væntanlega aðstöðu.

[Sigurgeir (IP-tala skráð) 25.5.2008 kl. 19:43]

Stendur til að breyta um húsnæði?

[Borgari (IP-tala skráð) 25.5.2008 kl. 21:04]

Þessi bloggsíða lofar góðu. En afhverju er ekki mynd af Breiðavík sem forsíðumynd/bloggvinarmynd (eða einhverja hlutlausa mynd) en ekki mynd af einhverjum manni?

[SVB, 25.5.2008 kl. 22:49]

Takk fyrir innlitið. BRV vonast eftir því að geta tekið á leigu herbergi til að koma upp lágmarks skrifstofuaðstöðu og fá til þess styrk. En fréttir af því eru enn ótímabærar, látið verður vita.

Forsíðumyndin eða myndin í hausnum er af dreng á Breiðavík eftir barsmíðar. Hún er því mjög táknræn. En aðrar myndlausnir eru til og ekkert sem kemur í veg fyrir að skipta hvenær sem er. Kíktu reglulega í heimsókn Borgari og haltu okkur við efnið! 

[SVB, 26.5.2008 kl. 13:51]

Komment frá Konráði Ragnarssyni:

"Ég sé mig tilneyttan að senda þessa athugsemd gegnum rafpóst til félagsmanna þar sem nýja bloggsíða samtakanna tekur ekki við mínum athugasemdum,búinn að reyna í tvo dag,það virðist ekki allir mega gera athugasemdir á þessu bloggi og hver ástæðan er get ég bara giskað á.

En hér er það sem ég vildi hafa sagt á því bloggi.

Kveðja, Konráð

Vill gera alvarlega athugasemd um þá yfirlýsingu þína að samtökin séu sátt við það að frumvarp vegna væntanlegra skaðabóta til "Breiðavíkurdrengja" sé frestað fram á  haustið.

Ég held að flestir drengjana hefðu viljað sjá þetta klárað núna í vor.

Óþolandi að "formaður" sé  með svona einka yfirlýsingar án þess að hafa nokkuð fyrir sig í því ,hvað félagsmenn vilja. 

Margir af Breiðavíkurdrengjunum eru alvarlega veikir,og kannski ekki allir sem lifa það af að bíða, þó það sé bara fram á haustið,og hver veit nema þetta frestist ennþá lengra.

Það yrði sorglegt til þess að vita að ef sumir menn fengju ekki að njóta réttláta uppreisn æru og skaðabóta vegna virðingarleysi sumra manna gagnvart félagsmönnum!

Konráð Ragnarsson"

[SVB, 26.5.2008 kl. 13:52]

Mér þykir afskaplega miður að Konráði hafi ekki tekist að koma athugasemdum (kommentum) á bloggsíðuna nýju. Ég hef enga skýringu á því. Fyrstu 1-2 dagana var bloggið svo stillt að athugasemdir færu fyrst í gegnum stjórnandann (mig) en hugsunin var að rit-stýra (ekki rit-skoða) enda eru því miður margir dónalegir og tillitslausir að kommentera í Bloggheimum algerlega málefnalaust. En eftir ósk frá Víglundi Þór þá var ákveðið að opna alveg fyrir komment, þannig að ekki fæ ég almennilega skilið hvers vegna Konráði hefur gengið þetta illa. Ég hafna því algerlega að ég sé að gera einhvern mannamun hvað komment varðar. Reyndu betur, Konráð, en í millitíðinni setti ég inn það sem þú sendir formanni með tölvupósti.

kv.

fþg

[Stjórnandi síðunnar (IP-tala skráð) 26.5.2008 kl. 13:56]

Þetta er prufa til að kanna hvort einhver vandræði séu með athugasemdakerfið. Ef þetta birtist er ljóst að allir eiga að geta gert athugasemdir án vandræða!

[Konráð Ragnarsson, 26.5.2008 kl. 16:00]

Ég vil þakka Friðriki að koma athugasemd minni inn á bloggið,og í leiðinni prufa hvort þessi færsla fari ekki örugglega inn.

Kveðja,

Konráð 

[Konráð Ragnarsson, 26.5.2008 kl. 16:00]

Það tókst!!!!!!!!!!!!!

[SVB, 26.5.2008 kl. 16:26]

Flott Konráð. Ég sendi þér áðan meldingu um bloggvináttu; endilega samþykktu hana!

Gott væri að fá ábendingar frá sem flestum um blogg- eða annars konar netsíður félaga/vistmanna eða um aðrar síður sem tengjast hagsmunamáli samtakanna.

fþg 

[Esther Erludóttir (IP-tala skráð) 6.6.2008 kl. 00:41]

Þessi samtök eru orðin að rugli og vitið menn að þessi frumfarpi nái ekki að kom fyrr en í haust:::::::::::::::::::

og það eina sem þið vilið er Nesti ofaná Brauð