„Sannleikurinn er sár en hann verður að koma fram“

„Sannleikurinn er sár en hann verður að koma fram,“ segir Víglundur Þór Víglundsson í Blaðinu (nú 24 stundir) þann 11. júlí 2007, en Víglundur var vistaður í Breiðavík árin 1966 til 1968. Við rifjum hér upp viðtalið.

 

„Hann, ásamt fleirum sem hafa dvalið á upptökuheimilum, skrifar á heimasíðu Breiðavíkursamtakanna um reynslu sína af heimilunum. Ákvörðun var tekin um að nafngreina alla gerendur þar og takast á við afleiðingarnar ef einhverjir verða ósáttir við það.

„Það er auðvitað sárt fyrir afkomendur gerendanna að lesa slæmar lýsingar um skyldmenni sín en þetta er líka sárt fyrir okkur og okkar afkomendur.“

Margir sem dvöldu á upptökuheimilum hafa gefið sig fram eftir opnun síðunnar í fyrradag og viljað ganga í samtökin.

 
Víglundur var sjö ára þegar hann var fyrst sendur í vistun vegna erfiðra heimilisaðstæðna. Hann segir enga óreglu hafa verið á heimili sínu heldur hafi móðir hans orðið þunglynd eftir skilnað. „Hún kynntist svo öðrum manni og hef ég á tilfinningunni að ég hafi verið fyrir.“

 

Þegar Víglundur var ellefu ára var hann sendur til Breiðavíkur. „Ég hafði náttúrlega ekki hugmynd um hvað beið mín. Þetta var alveg allt í lagi fyrst en svo kynntist ég mannvonsku af verstu gerð.“

Allan tímann í Breiðavík mátti Víglundur sæta miklum barsmíðum. „Mín dvöl var algjör martröð. Þegar ég hitti strákana aftur sem voru með mér í Breiðavík þá voru þeir hissa á að ég skyldi hafa lifað þetta af og væri enn á lífi. Ég hlýt bara að hafa verið svona sterkur.“

 

Þegar líða tók að lokum dvalar Víglundar var hann orðinn elstur þar. Segir hann forstöðumanninn þá hafa notað sig til þess að sýna hinum strákunum hvað væri gert til þess að ala fólk upp. „Hann barði mig ekki í einrúmi heldur alltaf fyrir framan alla. Stundum varð ég svo bólginn að andlitið á mér var allt afskræmt“.

 
Fékk viðurnefnið Villi tígull

 
Ein sterkasta minning Víglundar er þegar hann gerði tilraun til að strjúka. Var hann þá settur í gluggalaust herbergi þar sem var kolniðamyrkur, heitt og algjör þögn. „Forstöðumaðurinn gekk svo illa frá mér eftir strokutilraunina að meira að segja konan hans kom og reyndi að stoppa hann. Hún skipti sér vanalega ekki af barsmíðunum.“

Í marga mánuði eftir þetta var hann með tígullaga far eftir steininn í hring forstöðumannsins á gagnauganu og fékk þá viðurnefnið Villi tígull“.

Athugasemdir

[Víglundur Þór Víglundsson, 25.5.2008 kl. 23:02]

Þetta er góð mynd, svona líta vinir út.

[Fyrrum vandræðaunglingur (IP-tala skráð) 26.5.2008 kl. 14:46]

Jæja, það hefur verið umræða í loftinu um að frumvarpið vegna væntanlegra skaðabóta til Breiðavíkurdrengja verði frestað fram á  haustið. Þetta er nú  spor í rétta átt, hvort sem það frestast um hálft ár eða svo!  En hver gætir hagsmuna Breiðavíkurstelpnanna sem þar voru vistaðar - hvers vegna eru þær ekki með drengjunum í skaðabótakröfunni???   Sagt er að tímabilin hjá Þórhalli Hálfdánarsyni og Hallgrími Sveinssyni hafi verið verst og þau börn sem þar voru þá fái ein bætur og sér hver heilvita maður að þar er mikil mismunun í gangi gagnvart börnum sem voru þar á öðrum tímabilum. En þá er það stóra spurningin til ykkar allra. Hvernig verður þessum skaðabótum skipt milli Breiðavíkurdrengja? Fá allir þessir drengir frá þessum úrvöldu tímabilum bætur eða bara þeir sem geta sannað að þeir voru lamdir og kvaldir eða kynferðislega misnotaðir? Þeir drengir sem þarna voru vistaðir og misnotuðu aðra drengi kynferðislega og lömdu þá og kvöldu – fá þeir líka bætur? Hverjir eru á nafnalistanum um gerendur þarna í Breiðavík? Eru þeir piltar þá mínusaðir frá? Fróðlegt ef einhver hér getur svarað þessu.     

[SVB, 26.5.2008 kl. 15:09]

Já, góð vinamynd Víglundur. Síðan sendi þér ósk um bloggvináttu, sem vonandi verður svarað jákvætt fljótlega.

Fyrrum vandræðaunglingur: Þú ert kominn heldur framúr þér. Það eru stjórnvöld sem munu smíða frumvarp til laga um bætur og fleira og það frumvarp hefur ekki litið dagsins ljós og gerir það væntanlega ekki fyrr en í haust. Fram að því hefur enginn okkar vitneskju um hverjir koma til með að fá bætur og hvort einhverjir verði undanskildir. Gott væri að fá að vita hvaðan þú færð upplýsingar um að eingöngu Breiðavíkurdrengir fái bætur en ekki stelpurnar, sem komu þangað 1972 og síðar. Við hyggjum að það sé ekki rétt en undirstrikum að engin útfærsla liggur enn fyrir. Og nafnalisti yfir gerendur liggur engum okkar aðgengilegur. Það er hins vegar vel skiljanlegt að sumir séu tvístígandi yfir því hvort gerendur eigi að fá bætur. Flækir málin að gerendur eru oft þolendur. Allt verðu þetta í deiglunni fram að haustþingi og má geta þess að hinn mikilsvirti mannréttindalögfræðingur Ragnar Aðalsteinsson er réttargæslumaður fyrrum vistmanna - allra.