61 af 72 höfðu skrifað undir á föstudag

 Í fyrsta hluta bréfasendinga á sáttatilboðum til Breiðavíkurbarna fóru út 72 sáttaboð, en þar var um að ræða þá kröfuhafa af alls 118 sem lifandi eru og höfðu gefið Spanó-nefndinni (Vistheimilanefnd) skýrslu. Embætti sýslumanns hafði á föstudag borist 61 undirritað sáttaboð (samþykki). Innanríkisráðuneytinu hafa verið send sáttaboðin til útborgunar um leið og þau hafa borist. Eftir því sem sýslumannsembættið best veit komu 51 sáttaboð nægilega tímanlega til að unnt væri að greiða bætur í 1. apríl og ekki annað vitað en að greiðslur hafi verið inntar af hendi í öllum þeim tilvikum, nema einu (þar kom í ljós að upplýsingar frá bótakrefjanda voru ekki fullnægjandi).  Nokkur sáttaboð bárust of seint til að unnt væri að greiða bætur þann fyrsta apríl en það verður gert strax eða fljótlega eftir helgina.

 Þetta kemur fram í svari Halldórs Þormars Halldórssonar hjá sýslumanni við fyrirspurn bloggsíðu SVB. "Þau sáttaboð sem berast á næstu dögum verða öll send ráðuneytinu jafnóðum og munu bætur verða greiddar innan 5 daga eftir að þau berast þangað. Bætur munu verða greiddar jafnóðum eftir því sem sáttaboðin berast og ekki verða geymd þar til fyrsta dag næsta mánaðar eins og ákveðið er í lögunum, enda engin ástæða til þess".

 Í öðrum hluta fóru (sl. mánudag) boð til þeirra sem lýstu kröfu en  fóru ekki í viðtal hjá vistheimilanefnd og að auki vegna einnar kröfu frá aðila sem fór í viðtal en sendi kröfuna of seint. Send voru 20 sáttaboð. Ekkert þeirra hafði borist embættinu til baka á föstudag. Sáttaboð vegna vistunar 24 látinna einstaklinga voru að fara út á föstudag og berast til viðtakenda strax í byrjun næstu viku. Frestur til að samþykkja sáttaboð eru 30 dagar frá móttöku bréfsins. "Ef einhver sáttaboð berast síðar verður metið hvort þau verði tekin til greina. Allavega verður haft samband við viðkomandi og kannað hver vilji hans sé í málinu".

  Halldór getur þess að vegna einstaklinga sem búa erlendis hefur þess verið óskað að Seðlabankinn veiti undanþágu frá gjaldeyrishöftum. Var því erindi vel tekið af hálfu bankans, en sækja þarf um það sérstaklega í hverju tilviki. Undirritaður mun annast það ferli ef bótakrefjendur óska þess.

Öll sáttatilboð sem samþykkt eru hafa fyrirvara um aukinn rétt, ef slíkt kemur fram við að lög og reglur um sanngirnisbætur breytast. 

Fyrr hefur verið greint frá því að kröfuhafar vegna Breiðavíkurheimilisins hafi verið 120 alls. Þessi tala hefur verið leiðrétt og er nánar tiltekið 118. "Við athugun á kröfum vegna Breiðavíkur kom í ljós að örlítil ónákvæmni var um fjöldann. Upphaflega bárust 118 kröfur og svo komu tvær of seint (eftir 27. janúar), eða samtals 120. Kröfurnar sem komu of seint voru báðar teknar til greina. Þegar farið var nánar yfir kröfurnar varð ljóst að ein krafan var alls ekki vegna Breiðavíkur þótt hún hafi verið sett fram þannig og var hún því flokkuð með kröfum er varða annað vistheimili. Einnig varð ljóst að ein krafan var sett fram tvívegis og skráð sem tvær kröfur. Réttur fjöldi krafna er því 118.

Þegar fyrstu sáttaboðin voru send út var tveimur kröfum hafnað þar sem engin gögn fundust um að viðkomandi einstaklingar hafi verið vistaðir á heimilinu. Þessir tveir bótakrefjendur gátu líka litlar upplýsingar veitt sjálfir um vistunina. Var því talið mjög ólíklegt að þeir hafi verið vistaðir þar.

Athugasemdir

[Anna , 3.4.2011 kl. 15:25]

Eg vil 'oska ykkur tilhamingju. Eg veit ad tid eru bunir ad bida lengi eftir tessu. Gud veri med ykkur. Kaer Kvedja Anna Bjorg

[SVB, 3.4.2011 kl. 16:09]

Takk Anna Björg. Það er enda afrek út af fyrir sig að komið sé að greiðslu sanngirnisbótanna, þótt lítil ánægja sé með upphæðir bótanna. Það eru komin liðlega fjögur ár síðan "Breiðavíkurdrengirnir" stigu fram í fjölmiðlum, en ég held að þetta hefði ekki getað tekið styttri tíma nema með nokkuð lægri bótum, samanber fyrstu tölur ríkisins. Ljóst er að upphæðirnar nú eru að jafnaði 2-3 milljónum króna hærri en á Haarde-tímanum. Á hinn bóginn eru bæturnar nú 1 til 1.5 milljón krónum lægri að jafnaði en ég átti von á. Ég taldi fyllilega raunhæft, miðað við mínar upplýsingar, að eitthvað á milli 10 og 30 einstaklingar í þessum hóp færu í hámarksbætur eða fast að því. fþg

[erla (IP-tala skráð) 12.4.2011 kl. 21:30]

Mig langar að spyrja,hvað er að frétta af sanngirnisbótunum með að fá þær borgaðar allar strax út,er það ekki í umræðunni?kveðja

[SVB, 14.4.2011 kl. 21:39]

Það hefur verið til skoðunar hjá yfirvöldum en ekki vitað til þess að niðurstaða hafi fengist.