Enn fellur Breiðvíkingur frá - Lee Reynir Freer

Það fór ekki hátt, en 14. ágúst dó enn einn Breiðvíkingurinn, líklega sá 34. af þeim sem vistuðust vestra 1953-1972 (af alls líklega 126) - Lee Reynir Freer (Hjörtþórsson í einhverjum eldri gögnum). Reynir var fæddur 3. ágúst 1945 og var því 65 ára - heimilislaus og að því er virðist bæði vina- og vandamannalaus.

Reynir vistaðist á Breiðavík frá 4. júlí 1955 til 1. maí 1958 eða í tæp 3 ár, 10 til 12 ára gamall. Þegar Breiðvíkingar "komu fram" í febrúar 2007 birti Stöð 2 viðtal við hann og má sjá sláandi frásögn hans á þessari slóð (myndskeiðið er ekki lengur tengt):

 

http://www.visir.is/article/200770208102

 

Einnig mátti í desember 2007 lesa frásögn Fréttablaðsins af því þegar hart var tekið á Lee Reyni fyrir að stinga inn á sig lifrarpylsukeppi í 10-11 í Austurstræti:

 

http://epaper.visir.is/media/200712070000/pdf_online/1_2.pdf

 

Lee Reynir átti við mikinn drykkjuvanda að etja, var heimilislaus og komst reyndar í fréttir fyrir fáeinum árum fyrir að dveljast í tjaldi í Öskjuhlíð. Hann átti að baki fjölda dóma og aðallega fyrir minniháttar brot.

 

8. júní 1991 birtist í Lesbók Morgunblaðsins ljóð eftir Lee Reyni, ort á Litla-Hrauni undir fyrirsögninni "Ort á Hrauninu" og lýkur þessari frásögn á ljóði hans:

 

Ef lífið þig leikur hart og grátt

og ljós þinnar sálar í svörtustu nátt

þá trúðu og treystu á Guðs æðri mátt

því tár græða sárin á himneskan hátt.

Athugasemdir

[Anna , 19.10.2010 kl. 11:20]

Mjog leit ad heyra thetta.Og megi Gud blessa alla thessa menn.Og ein af theim er brodir minn. Thjodfelagid brast tessum monnum sem dvoldu a Breidavik.

Og hvessvegna er ekki haegt ad gefa thessum monnum husnaedi skil eg ekki.? Thjodfelagid synir litla samud og umhyggju med heimillislausum.

Eg hef sitid med tessum monnum,drukkid kaffi og talad vid tha. Jafnvel utledingar eru ornir heimilislausir. Og sofa a gotum uti.

[SVB, 19.10.2010 kl. 13:39]

Lee Reynir kvæntist árið 1980 konunni Margréti Hermannsdóttur og bjuggu þau þá í Hafnarfirði. Veit einhver hvaða Margrét þetta er?

[SVB, 19.10.2010 kl. 15:08]

Okkur var að berast póstur frá Breiðvíkingi:

Reynir kom til Breiðavíkur meðan ég var þar. Það var illa farið með hann af eldri strákum, sérstaklega þó einum. Ég man sérstaklega eftir vísum sem hann kunni, hér eru tvær sem ég lærði af honum. 

Maðurinn gerir miður gagn,

misjafnlega virtur,

skröltir eins og skíta vagn

skældur og illa hirtur.

Hér er hin, sem ég setti í samband við klósettið í Bankastræti.  

Það er dauðans nöpur neyð

og harla lítil kæti

að aka skítnum alla leið

ofan í Bankastræti.

Þekki ekki höfundinn".