„Faðir minn átti aldrei möguleika“

Nýtt í DV.

Faðir minn átti aldrei möguleika,“ segir Þráinn Eðvaldsson, sonur Eðvalds Magnússonar. Eðvald var einn Breiðavíkurdrengja og féll fyrir eigin hendi árið 2005. Hann svipti sig lífi kvöldið áður en til stóð að Breiðavíkurdrengir hittust allir í fyrsta sinn til þess að ræða dvölina þar.

Hlutfall þeirra vistbarna sem eru látin í dag segir sína sögu. 33 af alls 158 vistbörnum Breiðavíkurheimilisins á árunum 1952–1979 eru látin. Þess utan hefur Breiðavíkurnefndin sem leitaði vistmenn uppi greint frá því að ellefu einstaklinga hafi hún ekki fundið. Eðvald Magnússon dvaldi á Breiðavík frá 24. febrúar 1966 til 21.desember 1967. Þá var yfirmaður heimilisins Þórhallur Hálfdánarson sem viðurkennt er að hafi beitt vistbörn ofbeldi.

Gat ekki haldið heimili
Þráinn ólst upp hjá móðurforeldrum sínum því Eðvald sinnti föðurhlutverkinu illa enda glímdi hann við mikla vanlíðan öll sín ár.
Þráinn fékk samt stundum að hitta föður sinn þegar hann átti góða daga og var ekki langt leiddur af áfengis- og fíkniefnaneyslu. „Þá fórum við í bíó eða gerðum eitthvað skemmtilegt saman,“ segir Þráinn frá. „Faðir minn gat ekki annast mig. Hann hélt til að mynda aðeins einu sinni á lífsleiðinni heimili. Ég man að mér fannst nokkuð til þess koma. En það stóð ekki lengi því hann gat ekki hugsað um sjálfan sig eins og aðrir. Honum leið of illa til þess. Móðir mín var of ung til að annast mig og því kom það í hlut foreldra hennar. Hún var mér eins og systir og er enn í dag. Ég ólst upp við gott atlæti hjá ömmu og afa og það er lukkan í mínu lífi.“

Opinskátt viðtal við Þráinn Eðvaldsson í páskablaði DV

Í greininni er rangfært að Björn Loftsson hafi verið yfirmaður á þessum tíma. Það er Þórhallur Hálfdánarson sem var yfirmaður á þessum tíma.

http://www.dv.is/frettir/2011/4/20/sonur-breidavikurdrengs-berst-fadir-minn-atti-aldrei-moguleika/

 

61 af 72 höfðu skrifað undir á föstudag

 Í fyrsta hluta bréfasendinga á sáttatilboðum til Breiðavíkurbarna fóru út 72 sáttaboð, en þar var um að ræða þá kröfuhafa af alls 118 sem lifandi eru og höfðu gefið Spanó-nefndinni (Vistheimilanefnd) skýrslu. Embætti sýslumanns hafði á föstudag borist 61 undirritað sáttaboð (samþykki). Innanríkisráðuneytinu hafa verið send sáttaboðin til útborgunar um leið og þau hafa borist. Eftir því sem sýslumannsembættið best veit komu 51 sáttaboð nægilega tímanlega til að unnt væri að greiða bætur í 1. apríl og ekki annað vitað en að greiðslur hafi verið inntar af hendi í öllum þeim tilvikum, nema einu (þar kom í ljós að upplýsingar frá bótakrefjanda voru ekki fullnægjandi).  Nokkur sáttaboð bárust of seint til að unnt væri að greiða bætur þann fyrsta apríl en það verður gert strax eða fljótlega eftir helgina.

 Þetta kemur fram í svari Halldórs Þormars Halldórssonar hjá sýslumanni við fyrirspurn bloggsíðu SVB. "Þau sáttaboð sem berast á næstu dögum verða öll send ráðuneytinu jafnóðum og munu bætur verða greiddar innan 5 daga eftir að þau berast þangað. Bætur munu verða greiddar jafnóðum eftir því sem sáttaboðin berast og ekki verða geymd þar til fyrsta dag næsta mánaðar eins og ákveðið er í lögunum, enda engin ástæða til þess".

 Í öðrum hluta fóru (sl. mánudag) boð til þeirra sem lýstu kröfu en  fóru ekki í viðtal hjá vistheimilanefnd og að auki vegna einnar kröfu frá aðila sem fór í viðtal en sendi kröfuna of seint. Send voru 20 sáttaboð. Ekkert þeirra hafði borist embættinu til baka á föstudag. Sáttaboð vegna vistunar 24 látinna einstaklinga voru að fara út á föstudag og berast til viðtakenda strax í byrjun næstu viku. Frestur til að samþykkja sáttaboð eru 30 dagar frá móttöku bréfsins. "Ef einhver sáttaboð berast síðar verður metið hvort þau verði tekin til greina. Allavega verður haft samband við viðkomandi og kannað hver vilji hans sé í málinu".

  Halldór getur þess að vegna einstaklinga sem búa erlendis hefur þess verið óskað að Seðlabankinn veiti undanþágu frá gjaldeyrishöftum. Var því erindi vel tekið af hálfu bankans, en sækja þarf um það sérstaklega í hverju tilviki. Undirritaður mun annast það ferli ef bótakrefjendur óska þess.

Öll sáttatilboð sem samþykkt eru hafa fyrirvara um aukinn rétt, ef slíkt kemur fram við að lög og reglur um sanngirnisbætur breytast. 

Fyrr hefur verið greint frá því að kröfuhafar vegna Breiðavíkurheimilisins hafi verið 120 alls. Þessi tala hefur verið leiðrétt og er nánar tiltekið 118. "Við athugun á kröfum vegna Breiðavíkur kom í ljós að örlítil ónákvæmni var um fjöldann. Upphaflega bárust 118 kröfur og svo komu tvær of seint (eftir 27. janúar), eða samtals 120. Kröfurnar sem komu of seint voru báðar teknar til greina. Þegar farið var nánar yfir kröfurnar varð ljóst að ein krafan var alls ekki vegna Breiðavíkur þótt hún hafi verið sett fram þannig og var hún því flokkuð með kröfum er varða annað vistheimili. Einnig varð ljóst að ein krafan var sett fram tvívegis og skráð sem tvær kröfur. Réttur fjöldi krafna er því 118.

Þegar fyrstu sáttaboðin voru send út var tveimur kröfum hafnað þar sem engin gögn fundust um að viðkomandi einstaklingar hafi verið vistaðir á heimilinu. Þessir tveir bótakrefjendur gátu líka litlar upplýsingar veitt sjálfir um vistunina. Var því talið mjög ólíklegt að þeir hafi verið vistaðir þar.

Þór Saari: Í engu samræmi við væntingar

Frétt á mbl.is: "Þór Saari, þingmaður Hreyfingarinnar, segir að sanngirnisbæturnar sem hafa verið greiddar út vegna dvalar á vistheimilinu í Breiðavík séu smánarlegar og ósanngjarnar. Þór hyggst leita eftir því að málið verði skoðað aftur á vettvangi þingsins og að það verði leiðrétt með einhverjum hætti.

„Það er að mínu mati Alþingi til vansa ef það lætur þetta mál fá svo skammarlegan endi. Ég mun því leita eftir því við formann allsherjarnefndar, allsherjarnefnd og alla formenn þingflokka um að málið verði skoðað aftur á vettvangi þingsins með það fyrir augum að niðurstaða sýslumanns og framganga framkvæmdavaldsins verði með einhverjum hætti leiðrétt,“ sagði Þór á Alþingi í dag.

Alþingi samþykkti lög um sanngirnisbætur fyrir misgjörðir á stofnunum eða heimilum þann 28. maí í fyrra. Sýslumaðurinn á Siglufirði hafði umsjón með fyrstu afgreiðslu bótanna fyrr í þessum mánuði.

„Afgreiðslan var í engu samræmi við þær væntingar sem lagt var upp með, hvorki af hálfu Breiðavíkurdrengja, forsætisráðherra, allsherjarnefndar eða Alþingis sjálfs, sé tekið mið af umræðunni sem var í þinginu og nefndinni um málið,“ sagði Þór.

„Sýslumaðurinn á Siglufirði virðist hafa farið út fyrir hlutverk sitt og sett upp einhverskona reikniverk byggt á stigum og hvers aðferðafræði er mjög óljós. En þess má geta að nefnd undir stjórn Viðars Más Matthíassonar lagaprófessors hafði einmitt lagt til slíkt reikniverk á sínum tíma, en það var slegið út af borðinu sem óframkvæmanlegu. Ekki er heldur kveðið á um slíkt reikniverk í lögunum,“ sagði Þór.

Hann segir að reikniverk sýslumannsins á Siglufirði hafi gert það að verkum að „sanngirnisbætur til Breiðavíkurdrengja eru smánarlegar og ekki að neinu marki sanngjarnar, og enginn þeirra er sáttur við þær.“

Margir hverjir hafi þó samþykkt bæturnar. „Bæði vegna lítt dulbúins hótunartóns í bréfi sýslumanns en ekki síður vegna þess að þeir hafa persónulega fengið nóg af málinu og því sem þeir kalla endalausa fyrirlitningu stjórnvalda í sinn garð,“ sagði Þór".

http://www.mbl.is/frettir/innlent/2011/03/30/althingi_leidretti_sanngirnisbaetur/ 

Fundir með Ögmundi og félagsfundur á þriðjudag

Erna Agnarsdóttir formaður og Unnur Millý Georgsdóttir varaformaður SVB hittu Ögmund Jónasson innanríkisráðherra á fundi í dag til að ræða sanngirnisbótamálin í kjölfar sáttatilboða sýslumannsins á Siglufirði á dögunum. Margar spurningar hafa vaknað um framkvæmd laganna um sanngirnisbætur og upphæðir sáttatilboðanna, en margir kröfuhafanna eru óánægðir með tilboðin.

"Ég og Unnur Millý vorum að koma af fundi hjá innanríkisráðherra Ögmundi Jónassyni og ráðuneytisstjóra Ragnhildi Hjaltadóttur. Mjög góður fundur. Farið var yfir málin í heild sinni. Þau ætla að athuga hvernig stendur á þessum töfum á greiðslum, einnig var ákveðið að reyna að hafa aftur fund í næstu viku. Að öllum líkindum á mánudag," segir Erna á facebook-síðu samtakanna, en meðal annarra umræðuefna voru eingreiðslur, útreikningar á punktum og sú staðreynd að enginn í þessum fyrsta hópi kröfuhafa hafi náð hámarksbótum.

Ekki þykir rétt að greina nánar frá þessum viðræðum fyrr en nánari svör hafa komið á mánudags-fundinum með ráðherra. Þau verða hins vegar vonandi komin skýr þegar félagsfundur samtakanna brestur á, næsta þriðjudagskvöld kl. 19:30 á hefðbundnum fundarstað.

Fundur um sendinguna frá Sýsla

Félagsfundur Samtaka vistheimilabarna í mars-mánuði verður að gefnu tilefni flýtt og verður hann haldinn í fundarsalnum í JL-húsinu þriðjudagskvöldið 15. mars klukkan 19:30.

Aðal umræðuefni fundarins er útkoma bréfs sýslumanns á Siglufirði er varða sanngirnisbætur til handa fyrrum vistbörnum Breiðavíkur. Vegna fyrstu skýrslu Spanó-nefndarinnar, um Breiðavíkurheimilið, komu fram 120 kröfur um sanngirnisbætur. Þar af eru 17 vegna erfingja látinna fyrrum vistbarna og taka þau mál eitthvað lengri tíma, en á miðvikudag í næstu viku sendir sýslumaður þá um 103 sáttatilboð. Þessi tilboð varða hins vegar ekki bara Breiðavíkurbörnin, því þau gefa um leið tóninn fyrir bætur vegna annarra vistheimila.

Rétt er að minna á að sáttatilboð sýslumanns getur hver kröfuhafi samþykkt eða hafnað. Finnist einhverjum tilboðið of lágt er einfaldlega næsta skref að kæra tilboðið til úrskurðarnefndar og fá þá kröfuhafar á kostnað ríkissjóðs 10 klukkustunda vinnu lögfræðings sér til fulltingis. Þeir sem aftur á móti eru sáttir við tilboðið taka því einfaldlega, fá greitt fljótlega og skrifa undir afsal á frekari kröfum.

Sáttatilboð Sýsla koma "fyrstu dagana í mars"

Vildi bara koma þessari athugasemd frá vefsíðu sýslumanns á framfæri, ef fólk er að bíða fyrir framan póstkassann núna;-)

"Stefnt er að því að tilboð um bætur verði send flestum fyrstu dagana í mars, en skv. lögum um sanngirnisbætur er skylt að senda þeim sem dvöldu á tilteknu heimili tilboð um bætur samtímis eftir því sem unnt er."

En maður veit aldrei, kannski fá einhverjir í bréf í dag. Ekki það að manni hafi ekki grunað að þetta myndi seinka eitthvað, ríkið er svo fyrirsjánlegt í svona málum.

Bestu kveðjur,
Konni

UPPFÆRSLA AF VEF SÝSLUMANNS:

"Vegna dvalar á vistheimilinu Breiðavík bárust 120 kröfur.  Margar þeirra bárust á síðustu dögum frestsins og afla þarf gagna vegna þeirra og fjalla um þær efnislega. Stefnt er að því að tilboð um bætur verði sendar með ábyrgðarpósti eigi síðar en þann 9. mars n.k. 

Samþykkja þarf tilboðið innan 30 daga frá móttöku þess. Að öðrum kosti telst því hafa verið hafnað. Greiðsludagur bóta er fyrsti virki dagur næsta mánaðar eftir að tilboð hefur verið samþykkt. Rétt er að geta þess að bótakröfur vegna látinna vistmanna munu taka lengri tíma til afgreiðslu".

http://www.syslumenn.is/serstok-verkefni/onnur-verkefni/sanngirnisbaetur/

 

Pex og kex - vel sóttur félagsfundur

Félagsfund Samtaka vistheimilabarna, sem haldinn var þriðjudaginn 22. febrúar, sóttu 42 manns og þar af voru 2 viðmælendur, þau Guðrún Ögmundsdóttir tengiliður vistheimila og séra Bjarni Karlsson sóknarprestur í Laugarneskirkju.

 

Guðrún sagði frá framvindu mála hjá vistmönnum og -konum Breiðavíkur er varðaði framgang sýslumannsins á Siglufirði og að menn mættu eiga von á bréfi þaðan mánudaginn 28. febrúar.

 

Séra Bjarni talaði um fyrirgefninguna og hvernig við getum unnið úr okkar málum er varða æskuuppeldið og þær þjáningar sem hver og einn hefur orðið fyrir í þeim efnum. Guðný Sigurgeirsdóttir nýr félagi og æskuvinur sr. Bjarna sagði okkur frá því hvernig hún hafi tekið til í sínum málum undanfarin þrjú ár, hafi hún leitað á náðir Jesú Krists í bænum hans og fundið ró í bænum hans.

 

Miklar umræður fóru fram og fyrirspurnir voru mestar er varðaði framgang mála hjá „Sýsla“ á Siglufirði og ekki voru allir sáttir eins og gefur að skilja því mennirnir eru misjafnir eins og þeir eru margir.

 

En allt fór þó vel fram og bauð Unnur Millý uppá kleinur og kex sem hún verslaði sjálf og við hin í stjórninni færum henni bestu þakkir fyrir.

 

Fundi var slitið af formanni rétt fyrir 23:00 og fóru menn sáttir af fundi.

 

Kær kveðja að norðan

Marió H. Þórisson ritari stjórnar.

Félagsfundur SVB með góðum gestum

Stjórn Samtaka vistheimilabarna (SVB, áður Breiðavíkursamtakanna) minnir á komandi félagsfund þriðjudagskvöldið 22. febrúar næstkomandi kl. 19:30 í fundarsal Reykjavíkurakademíunnar í JL-húsinu.

Að þessu sinni er boðið upp á tvo gesti á fundinum. Í annað sinn kemur tengiliður vistheimila á okkar fund og gerir grein fyrir störfum tengiliðs og svarar spurningum. Þá mætir á fundinn og flytur erindi séra Bjarni Karlsson og mun ekki síst fjalla um fyrirgefninguna. Enn fremur eru líkur til þess, en óstaðfest enn, að Pétur Tyrfingsson sálfræðingur mæti til að ræða um sálfræðiþjónustu og annað því tengt, vegna fyrrum vistbarna vistheimila hins opinbera.

Fundurinn er opinn öllum sem hafa verið vistaðir utan heimilis síns og þeim sem áhuga hafa á barnaverndarmálum.

75% Breiðvíkinga með bótakröfu - næsta innköllun auglýst í dag

Alls fær sýslumaðurinn á Siglufirði 119 kröfur um sanngirnisbætur frá fyrrum vistmönnum Breiðavíkur og erfingjum látinna vistmanna Breiðavíkur. Vistmenn á Breiðavík voru alls 158 og því koma fram bótakröfur vegna 75% þeirra. Innköllun krafna vegna vistmanna Kumbaravogs og Heyrnleysingjaskólans hefst í dag, 3. febrúar, samkvæmt auglýsingu í blöðum dagsins.

Viðtöl hófust hjá tengilið vistheimila vegna Breiðavíkurbarna þann 11. október síðastliðinn og síðasta krafan fylltist út 26. janúar. Alls höfðu 191 einstaklingar hringt og rætt við tengilið til að fá ýmsar upplýsingar og bóka viðtalstíma. Af 119 kröfum á umsóknareyðublaði voru 17 frá erfingjum látinna Breiðvíkinga, en alls eru látnir Breiðvíkingar (tímabilsins 1953-1980) nokkuð á fjórða tuginn.

Auk þess að veita liðveislu vegna kröfuumsókna vann tengiliður í ýmsum öðrum málum fyrir eða vegna Breiðvíkinga; svo sem Félagsþjónustu sveitarfélaga (gert samkomulag eftir því sem mál bárust vegna stuðningsþjónustu við einstaklinga sem þess óskuðu og þurftu á að halda), sálfræðinga (sem haft hafa einstaklinga í viðtölum vegna vistunar, svo og til að koma nýjum einstaklingum í viðtöl), einstaklinga/fagmenn með sérþekkingu á þessum málaflokki, lögfræðinga vegna einstaklingsmála og ráðgjöf til lögfræðinga, samtöl við starfsmenn heimila/stofnana sem hafa með fyrrum vistmenn að gera (geðhjálp,athvörf,félagsþjónusta ofrv.), Reykjavíkurborg (starfandi er teymi starfsmanna í þessum málaflokki og er tengiliður aðili að því) og ráðuneyti málaflokksins. Fyrir utan samstarf við aðila eins og Vistheimilanefnd (Spanó-nefnd) og Breiðavíkursamtökin (nú Samtök vistheimilabarna).

Innköllun krafna vegna skýrslu nr. 2 er auglýst í blöðum dagsins og nær til fyrrum vistmanna Kumbaravogs (1965-1984) og Heyrnleysingjaskólans (1947-1992). Í auglýsingunni kemur fram að kröfur þurfi að berast fyrir 20. maí en annars fellur rétturinn niður.  Kröfu má lýsa á eyðublaði sem er að finna á www.sanngirnisbætur.is eða hjá tengilið vistheimila (sjá upplýsingar hér til vinstri á síðunni).

Nú í byrjun febrúar eru 4 ár liðin frá því að málefni Breiðavíkur og fleiri heimila komust í kastljós fjölmiðlanna.

UPPFÆRSLA um sálfræðiþjónustu:

Tengiliður vistheimila hefur unnið í samstarfi við ýmis sveitarfélög vegna kostnaðar við sálfræðiþjónustu við einstaklinga sem dvalið hafa á þeim stofnunum sem lög um sanngirnisbætur ná til.  

Þar sem stór hluti þessara einstaklinga kemur frá Reykjavík var búið til sérstakt teymi hjá Reykjavíkurborg sem er með þessi mál og er Tengiliður aðili að því teymi.  Um er að ræða fagfólk með mikla reynslu og þekkingu á úrræðum og stuðningi.  Gert hefur verið samkomulag við nokkra sálfræðinga til að sinna þessum hóp (bæði frá Reykjavík og öðrum sveitarfélögum).  Nokkrir hafa þegar nýtt sér þessa þjónustu sveitarfélaganna og má búast við að fleiri notfæri sér  slíkt eftir því sem fleiri heimili bætast við vegna innköllunar um sanngirnisbætur.

Stjórn SVB skipti með sér verkum

 Stjórn Samtaka vistheimilabarna (áður Breiðavíkursamtakanna) hefur komið saman og skipt með sér verkum. Á nýafstöðnum aðalfundi var Erna Agnarsdóttir kjörin formaður, en verkaskipting stjórnar er að öðru leyti þessi: Unnur Millý Georgsdóttir varaformaður, Þór Saari gjaldkeri, Marinó Hafnfjörð Þórisson ritari og Esther Erludóttir meðstjórnandi.

Hér að neðan og í viðhengi eru lög samtakanna eins og þau nú gilda:

Lög Samtaka vistheimilabarna samþykkt á aðalfundi 25. janúar 2011

1.gr.

Félagið heitir Samtök vistheimilabarna.

2. gr.

Heimili samtakanna er hjá formanni hverju sinni og varnarþing er í Reykjavík.

3. gr.

Tilgangur samtakanna er að vera málsvari og hagsmunasamtök fólks sem vistað hefur verið á vegum hins opinbera á upptökuheimilum, einkaheimilum og öðrum sambærilegum stofnunum og beita sér fyrir forvarnar- og fræðslustarfi gegn ofbeldi af öllu tagi á börnum á fósturheimilum.

4. gr.

Tilgangi sínum hyggjast samtökin ná með því að styðja félagsmenn og halda uppi markvissu forvarnar- og fræðslustarfi.

5. gr.

Samtökin eru opin öllum sem hafa áhuga á barnaverndarmálum og sögu þeirra.

6.gr.

Stjórn samtakanna skal skipuð fimm félagsmönnum þ.e. formanni og fjórum meðstjórnendum og tveimur til vara. Þeir skulu kosnir á aðalfundi hvers árs. Formaður er kosinn sérstaklega en að öðru leyti skiptir stjórnin með sér verkum.

7.gr.

Stjórn fer með framkvæmdarstjórn í félaginu á milli aðalfunda. Formaður boðar stjórnarmenn á fundi þegar þurfa þykir, en halda verður stjórnarfund óski a.m.k. tveir stjórnarmenn þess. Félagsfundi skal halda þegar þurfa þykir, þó ekki sjaldnar en fimm sinnum á ári. Starfstímabil samtakanna er almanaksárið, aðalfundur skal haldinn í apríl eða fyrri hluta maí ár hvert. Á aðalfundi félagsins skal stjórn gera upp árangur liðins árs. Aðeins félagsmenn hafa atkvæðarétt á aðalfundi. Stjórn boðar til aðalfundar með a.m.k. 30 daga fyrirvara, með viðurkenndum boðskiptaleiðum sem undanfarandi félagsfundur samþykkir, svo sem með tölvupósti eða símleiðis. Dagskrá aðalfundar: Skýrsla stjórnar, reikningar, lagabreytingar, stjórnarkjör og önnur mál.

8.gr.

Ekki er um árgjald að ræða heldur eru samtökin fjármögnuð með styrkjum frá fyrirtækjum og einstaklingum. Auk þess er innheimt greiðsla fyrir fræðsluerindi á vegum félagsins. Öll vinna sem félagsmenn inna af hendi í þágu samtakanna er sjálfboðavinna.

9.gr.

Dagleg fjársýsla starfsjóðs er í höndum gjaldkera samtakanna en öll stærri fjárútlát skulu lögð fyrir stjórn til samþykktar.

10.gr.

Heimilt er að starfrækja innan samtakanna sérfélög um einstök vistheimili, en þau skulu vera fjárhagslega aðgreind frá móðursamtökunum og móta sínar eigin reglur á þann veg að brjóti ekki í bága við lög móðursamtakanna. Sérfélögin geri stuttlega grein fyrir starfsemi sinni á hverjum aðalfundi móðursamtakanna undir liðnum „önnur mál“.

11.gr.

Fari svo að félagið verði lagt niður þá verður sú ákvörðun tekin á aðalfundi með auknum meirihluta (fjórir/fimmtu).  Eignir þess skulu renna til félaga/samtaka er starfa í svipuðum tilgangi skv. ákvörðun aðalfundar.

 

Skrár tengdar þessari bloggfærslu:

• Lög SVB