Þór Saari: Í engu samræmi við væntingar

Frétt á mbl.is: "Þór Saari, þingmaður Hreyfingarinnar, segir að sanngirnisbæturnar sem hafa verið greiddar út vegna dvalar á vistheimilinu í Breiðavík séu smánarlegar og ósanngjarnar. Þór hyggst leita eftir því að málið verði skoðað aftur á vettvangi þingsins og að það verði leiðrétt með einhverjum hætti.

„Það er að mínu mati Alþingi til vansa ef það lætur þetta mál fá svo skammarlegan endi. Ég mun því leita eftir því við formann allsherjarnefndar, allsherjarnefnd og alla formenn þingflokka um að málið verði skoðað aftur á vettvangi þingsins með það fyrir augum að niðurstaða sýslumanns og framganga framkvæmdavaldsins verði með einhverjum hætti leiðrétt,“ sagði Þór á Alþingi í dag.

Alþingi samþykkti lög um sanngirnisbætur fyrir misgjörðir á stofnunum eða heimilum þann 28. maí í fyrra. Sýslumaðurinn á Siglufirði hafði umsjón með fyrstu afgreiðslu bótanna fyrr í þessum mánuði.

„Afgreiðslan var í engu samræmi við þær væntingar sem lagt var upp með, hvorki af hálfu Breiðavíkurdrengja, forsætisráðherra, allsherjarnefndar eða Alþingis sjálfs, sé tekið mið af umræðunni sem var í þinginu og nefndinni um málið,“ sagði Þór.

„Sýslumaðurinn á Siglufirði virðist hafa farið út fyrir hlutverk sitt og sett upp einhverskona reikniverk byggt á stigum og hvers aðferðafræði er mjög óljós. En þess má geta að nefnd undir stjórn Viðars Más Matthíassonar lagaprófessors hafði einmitt lagt til slíkt reikniverk á sínum tíma, en það var slegið út af borðinu sem óframkvæmanlegu. Ekki er heldur kveðið á um slíkt reikniverk í lögunum,“ sagði Þór.

Hann segir að reikniverk sýslumannsins á Siglufirði hafi gert það að verkum að „sanngirnisbætur til Breiðavíkurdrengja eru smánarlegar og ekki að neinu marki sanngjarnar, og enginn þeirra er sáttur við þær.“

Margir hverjir hafi þó samþykkt bæturnar. „Bæði vegna lítt dulbúins hótunartóns í bréfi sýslumanns en ekki síður vegna þess að þeir hafa persónulega fengið nóg af málinu og því sem þeir kalla endalausa fyrirlitningu stjórnvalda í sinn garð,“ sagði Þór".

http://www.mbl.is/frettir/innlent/2011/03/30/althingi_leidretti_sanngirnisbaetur/ 

Athugasemdir

[Dóttir Breiðavíkursdrengs (IP-tala skráð) 13.4.2011 kl. 12:11]

Þegar samningar náðust milli Breiðavíkursamtakana og ríkisins um bætur var gert ráð fyrir að bætur til einstaklings færu ekki yfir 6 milljónir. Ég held að ef legið hefði fyrir að flestum yrði boðin upphæð á bilinu 1-2 milljónir og það hæsta sem greitt yrði vegna Breiðavíkur yrði 5 milljónir, hefðu ekki náðst samningar. Munið að þegar hrunið varð samþykktu samtökin ,,afslátt af ýtrustu bótakröfum". Það er líka einkennilegt að ekkert tillit skuli tekið til hámarksupphæðarinnar. Var það að ásettu ráði sem ríkið setti hana fram, svona til að ná sáttum og ljúka málinu vitandi það að hvergi var getið um að þeir sem verst fóru út úr þessu myndu þó fá hámarskbætur og hinir reiknaðir út frá því? Af hverju höfðu þeir þá ekki upphæðina bara 10 millj. það hefði litið enn betur út á pappírunum? Ég held að það sé alls ekki hægt að miða bætur fyrir illa meðferð á börnum (mánuðum og árum saman) við illa meðferð barna sem ekki eru á ábyrggð yfirvalda. Það má ekki gleymast að með því að geyma börnin út í afdal (þar sem ættingjar höfðu nánast enga möguleika á að fylgjast með þeim) og neita þeim um alla menntun, var búið að slíta öll tengsl þeirra við umheiminn varanlega. Börnum var skilað heim (oft sem lögráða unglingum) þangað sem enginn þekki þau lengur, þau voru ekki gjaldgeng lengur í skóla, voru langt á eftir og kunnu ekki lengur reglur þess lífs sem þau áttu að lifa í til frambúðar. Með þessum bótum er verið að segja: ok hér eru smá bætur en þetta var nú ekki nærri eins slæmt og þið viljið af láta.  Ég bara trúi því ekki upp á Jóhönnu Sigurðardóttur að hún hafi plottað þetta svona!