Og þá tökum við þrjú skref áfram!

 Eins og sagt var frá hér á bloggsíðunni í gær hefur samtökunum borist bréf frá forsætisráðuneytinu og í Morgunblaðinu í dag (sbr. viðtengd frétt) tjáir Bárður R. Jónsson formaður sig um bréfið. Hann bendir réttilega á að viss atriði í bréfinu séu neikvæð, en tekur jafnframt fram að stjórnvöld vilji vinna að málinu í sátt við stjórnvöld og að útspilinu sem slíku sé fagnað.

Við ræðum efni bréfsins á félagsfundinum sem boðaður hefur verið n.k. þriðjudagskvöld (sjá síðustu færslu), en umsjónarmaður þessarar bloggsíðu bendir á neðangreinda færslu á bloggsíðu ritara stjórnar samtakanna (sem er einn og sami maðurinn!):

 "Ég er stjórnarmaður í Breiðavíkursamtökunum og tek að sjálfsögðu undir að viss atriði í nýju útspili (bréfi) forsætisráðuneytisins eru alls ekki jákvæð. Og fela jafnvel í sér afturför. En eins og Bárður formaður þá fagna ég líka (það stendur þarna í fréttinni) að unnið sé að málinu í sátt við Breiðavíkursamtökin, útspilinu er almennt fagnað og áfram munu viðræðurnar halda.

Staðreyndin er sú að viðræðurnar um bætur hafa skilað aðilum nokkuð áleiðis, þótt sumir vilji fara hraðar en aðrir og hugmyndir sumra um sanngjarnar bætur allt aðrar en hugmyndir annarra um hvað geti talist sanngjarnt í þessu efni.  Klárlega - og það er mín skoðun - eru viðræðurnar að þoka málinu áfram hvað aðferðarfræði varðar; menn eru ekki að þjarka um upphæðir eins og er. 

Og klárlega setti ráðuneytið í bréfið klásúlu sem leggst illa í fyrrum vistbörn á Breiðavík, þ.e. um mikla takmörkun á greiðslu bóta til erfingja látinna fyrrum vistbarna. Af um 150 fyrrum vistbörnum á Breiðavík 1954-1980 eru líklega 35-36 látin (sem er óhugnanlega hátt hlutfall hjá nú miðaldra fólki) og samkvæmt klásúlunni ættu aðeins erfingjar 2-3 þeirra að fá bætur (þ.e. vegna fyrrum vistbarna sem náðu að gefa Vistheimilanefnd skýrslu fyrir andlátið!). Þegar á þetta var bent í gær var ráðuneytið hins vegar fljótt að taka fram að viðkomandi orðalag yrði tekið til endurskoðunar. 

Ég skil gremju formannsins mjög vel og eins er ég sammála honum um að það sé takmarkað skjól í því að bera efnahagsástandið fyrir sig. Þessar bætur eru "smámunir" miðað við ýmislegt sem er að taka til sín fjármuni úr ríkissjóði. Og það má alltaf semja um tilhögun greiðslu bótanna, t.d. dreifa afborgunum. Eru menn ekki að tala um bætt efnahagsástand strax eftir næsta ár? Og enn vil ég vitna í Gylfa Ægisson: Ef það eru ekki til peningar fyrir Breiðavíkurbörnin þá eru ekki til peningar fyrir Icesave.

Ég vil persónulega ekki túlka það sem viljaleysi hjá stjórnvöldum að bótamálið gangi ekki hraðar fyrir sig. Mál þessi hafa þó þokast áfram eftir að Jóhanna tók við í forsætisráðuneytinu í upphafi þessa árs. Og það er samkvæmt vilja Breiðavíkursamtakanna að ekki var stefnt að samkomulagi um frumvarp nú á sumarþingi, heldur stefnt á haustþing, enda ástæða til að þoka hugmyndum um bótarétt og upphæðir upp á við".

 www.lillo.blog.is/blog/lillo/entry/911476/

Ný tillaga í Breiðavíkurmálinu skref aftur á bak

Athugasemdir

[Marta Gunnarsdóttir, 12.7.2009 kl. 00:50]

Ég styð þessi samtök ykkar heilshugar og vil alls ekki að einhverjar skammarlegar bætur verði samþykktar. Það væri skömm fyrir okkur hin sem þurftum ekki að þola þau sálarmorð sem framin voru á börnum í Breiðuvík.

Við höfum öll heyrt af allskonar sukki í þjóðfélaginu þar sem milljarðar eru eins og núll og nix í hugum fólks og hinar ýmsu ríkisstjórnir hafa stutt þá eyðslu.

Mér er ekki sama í hvað skattpeningar mínir fara og frekar vil ég að 16 milljarðar fari í Breiðuvíkurbörn en Sjóvá eða eitthvað annað fjármálasukk. 

Mér finnst skammarlegt hvað þetta réttlætismál Breiðavíkurbarna hefur dregist.

Baráttukveðjur.

[Friðrik Þór Guðmundsson, 12.7.2009 kl. 17:19]

Samtökin þakka Mörtu fyrir stuðninginn!

[Anna , 12.7.2009 kl. 21:05]

Ég styð þessi samtök og vona ég sé nú orðin félagi. Og vil ég benda á að nóg virðist vera til af peningum. Hvessvegna þá ekki greiða bætur fyrir brosnar sálir íslensk þjóðfélags eins og Breiðavíkudrengina.  Hópur manna sem gleymdist í öllu sukkinu. Er ekki verið að tala um NÝTT ÍSLAND. Sem er hvað.......Jú samúð gagnvart þessu mönnum. Sem mætti vera efst á lista um nýja Ísland.

[Friðrik Þór Guðmundsson, 12.7.2009 kl. 22:23]

Sæl Anna Björg. Aðeins þeir eru félagar sem sækja um! Ef þú vilt gerast félagi, sem er hið besta mál, sendu þá helstu lykilupplýsingar á [e-mail] - þú veist, addressu, símanúmer, email og þannig háttar.

[Katrín Magnúsdóttir (IP-tala skráð) 13.7.2009 kl. 11:02]

Sæll Friðrik.

Ég hef mest verið í sambandi við Georg Viðar en bróðir minn Kristján Friðrik Þorsteinsson var einn af Breiðuvíkurdrengjunum. Hann fyrirfór sér árið 1998. Hann náði sér aldrei eftir dvölina þar.

Við hefðum viljað skila inn skýrslu til vistheimilanefndar. Bróðir minn var t.d. fyrir utan allt ofbeldið sem hann varð fyrir sendur nær dauða en lífi til Reykjavíkur af Breiðuvík af því að mamma fór fram á það. Þá var hann með sprunginn botnlanga og kominn með lífhimnubólgu. Gröftur og saur um allt kviðarhol.

Mömmu dreymdi draum um bróður minn sem fékk hana til að hringja til Breiðuvíkur og athuga með bróðir minn. Þórhallur sagði þá við mömmu að bróðir minn væri bara með flensu og hafði ekki einu sinni kallað á lækni fyrir hann. Presturinn sem var á staðnum var þá búin að vaka yfir bróður mínum í einhverja daga.

Mamma fékk að tala við prestinn sem lýsti ástandinu á bróður mínum sem varð til þess að mamma krafðist þess að hann kæmi suður undir læknishendur. Það mátti þá ekki tæpara standa.

[Friðrik Þór Guðmundsson, 13.7.2009 kl. 11:27]

Þetta er mikilvægt framlag Katrín og hefði að sjálfsögðu þurft að ná eyrum Vistheimilanefndar (Spanó-nefndar). Gerðu það fyrir okkur öll að skrifa þetta ítarlegar, reyna eftir föngum að tilnefna daga og persónur og ekki síst prestinn sem þú nefnir. Var það kannski Sigurður Sigurðsson, síðar vígslubiskup? Hann hefur komið fram og er væntanlega ekki á móti því að staðfesta svona frásagnir. "Botnlangakastið" er einmitt skráð í bækur sálfræðingsins (vafalaust eftir frásögn Þórhalls) og að neðan sérðu hvernig tímabil bróðir þíns voru skráð. Fyrst tæplega eitt og hálft ár (sendur suður vegna "botnlangakastsins") og síðan 2 ár, alls 3 og hálft ár.

<span class=""><span class="">BACKGROUND</span></span>

Kristján Friðrik Þorsteinsson               29.3.57            14.3.66            2.9.67

           Kristján 2/2                             29.3.57            27.8.69            20.8.71

Átti Kristján börn? Að líkindum verða bætur til látinna Breiðavíkurbarna ekki greiddar foreldrum eða systkinum, bara svo það sé nefnt. En hvað sem því líður hefði frásögnin um Kristján auðvitað þurft að koma inn í vinnu Vistheimilanefndar.

[Jóhann Þór Hopkins, 15.7.2009 kl. 08:54]

það er núverandi ríkisstjórn til minkunar hvernig þetta mál virðist þvælast á milli manna, nú hefur komið í ljós að nefndarmenn ríkisins hafa þegar haft um 60 miljónir uppúr krafsinu, hver endanleg tala verður veit engin, hvaða kunningjapot er þarna í gangi, málið liggur ljóst fyrir og ætti ekki að þurfa taka allan þennan þennan tíma fyrir ríkið að gera þetta sómasamlega upp, en kanski stendur það bara als ekki til, þetta virðist vera orðið pólitískt þrætueppli, ég skora á Jóhönnu og hennar lið að taka nú af skarið og gera þetta mál upp straks,annað er þeim til vansæmdar.

[Friðrik Þór Guðmundsson, 16.7.2009 kl. 00:09]

Sælt veri fólkið. Vil biðjast afsökunar á því að ég hef ekki komist í að vinna grein um félagsfundinn upp úr fundargerðinni, en reyni á morgun, fimmtudag. Það ætti að takast.

Vil þó geta þess að felld var tillaga á fundinum um að taka "sáttalausn" sem byggðist á því að greiða út þann pening sem samþykktur var á fjáraukalögum og sem nefndin er að kroppa af, sem Jóhann Þór einmitt nefnir. Annars var andi fundarins að halda bara áfram á sömu braut í viðræðunum.